Wes-Kaap: “Die soektog na die sesjarige Joshlin Smith van Saldanha is hervat,” het Lt Kol Pojie vanoggend aan Rivier Rekord gesê.

Volgens Pojie het hy vroeg reeds met die ondersoekbeampte kontak gemaak en word alles moontlik gedoen om elke leidraad op te volg.

“Alle leidrade word steeds opgevolg en daar is vanoggend weer redding-en-opsporingshonde ontplooi en nog versterking is gestuur om te help met die soektog.”

Joshlin Smith is Dinsdag deur haar ma as vermis aangemeld by die Saldanha-polisiestasie.

Volgens inligting het Joshlin op Maandag nie wel gevoel het nie. Sy het tuis gebly en is in die sorg gelaat van haar ma se kêrel. Die middag, nadat haar ma vanaf die werk tuis gekom het, was Joshlin soek. Die ma het navraag gedoen by bure en kennisse om vas te stel of iemand Joshlin moontlik gesien het, maar sonder enige sukses. Die ma se kêrel, wat verantwoordelik was vir Joshlin, kon ook nie rekenskap gee van waar sy haarself bevind nie.

Die sesjarige Joshlin was ten tyde van haar verdwyning geklee in 'n ligblou t-hemp-en-denimbroek.

‘n Volskaalse soektog is van stapel gestuur. Die span bestaan uit die ondersoekbeampte verbonde aan die eenheid vir gesinsgeweld, kinderbeskerming en seksuele misdrywe (FCS), sigbare polisiëringslede, rampbestuurpersoneel en 'n groot aantal gemeenskapslede.

Enigiemand met inligting oor waar die vermiste Joshlin is, word versoek om die ondersoekbeampte, Sers Millstine van Vredenburg FCS te kontak by 079-879-8588. Alternatiewelik kan Crime Stop gebel word by 08600-10111.

Redakteur: Anchen Coetzee
Subredakteur: Ethan Cane