BARBERTON – Die plaaslike brandweer, asook Hi-Tech Barberton, was 25 Januarie, net na 0:00 in kennis gestel van 'n departementsvoertuig wat brand by die Ehlanzeni TVET Kollege in Generaal Straat. Die brand het vermoedelik ontstaan toe een of meer petrolbomme deur booswigte deur 'n Nissan Tiida se voorruit geslinger is. Die kar was geparkeer binne die kollege se gronde.

Volgens reaksie offisier van Hi-Tech, Shawn Kets, het hy vroeër die aand (24 Januarie) vier verdagte persone gewaar aan die oorkant van die kollege by die ou stoomlokomotief.

Africa InTouch News was omstreeks 0:15 op die toneel waar Kapt Riaan Prinsloo van Hi-Tech ons te woord gestaan het.  

Die brandweer het daarin geslaag om die vuur teen 01:20 te blus. Niemand is nog in verband met die voorval in hegtenis geneem nie.