Veldskool kinders ongedeerd na ongeluk
Onderwysers en leerders van Laerskool Barberton, wat vanaf die veldskool oppad was huis toe, was omstreeks 13:00 in 'n ongeluk betrokke. Almal is ongedeerd.
Die insident het plaasgevind by 'n T-aansluiting op die Oshoekpad ongeveer 50 km vanaf Amsterdam. Africa InTouch News het met die hoof van die skool, Robert Naudé, gepraat terwyl hy die bus terug vergesel het. Volgens hom het die ongeluk plaasgevind toe 'n bakkie die bus van agter getref het.
"Niemand van Laerskool Barberton is beseer nie, maar die kinders ly uit die aard van die saak aan skok. Ek is baie trots op die onderwysers van ons skool. Hulle het hul uitstekend van hul taak gekwyt," het hy gesê.
Van die passasiers wat in / op die bakkie gery het, het beserings opgedoen. Naudé het gesê dat van die onderwysers daar ook gehelp het deur noodhulp toe te pas. "Die kinders is oppad huis toe en die skool het reeds die ouers in kennis gestel van die insident."
Die bus behoort net voor 15:00 terug te wees in Barberton.
Geskryf deur: Anchen Coetzee vir Ama'Zone Media Solutions h/a Africa InTouch